(Visited 385 times, 2 visits today)
Libreng Marketing ng Isang SME

3 Simpleng Paraan Para sa Libreng Marketing ng Isang SME

ni Homer Nievera, CDE, CVM | Maituturing ba ang negosyo mo bilang isang SME? Sabihin na lang natin na kaya ka nagbabasa ng pitak na ito ay dahil nais mong matutunan ang mga bagay-bagay bilang isang negosyante sa kategoryang ito. Kung ganun na nga, narito ang mga tips ko para mai-marekt ka nang maayos.

#1 Email Marketing

Sa panahong teknolohiya, di pa rin maluluma ang paggamit ng email. Sa pagbukas ng mga account sa social media man o sa banko, mahalaga ang email, di ba? Kaya naman kung may listahan ka ng mga kostumer mo o kaya’y mga target mong kostumer, maaari ka ng magsimula gamit ang mga email nila.

Tandaan lang na di basta-basta ang nilalaman ng isang email. Dapat tandaan na personal ang paggamit nito kaya ang pangalan ng kostumer ay dapat na binabanggit, sa una pa lamang. Puede na din ang Mr./Mrs. o anumang titulo gaya ng Atty., Engr., at iba pa. Paggalang sa tao na tinatarget mo ang gamit ng mga titulong ito.

Ang susunod na laman ng email mo ay ang pagpapakilala sa kumpanya mo. Dapat, sa loob ng tatlong pangungusap, maiintindihan na nila kung sino ka at ano’ng ginagawa mo. Ang isusunod agad na laman ng email ay ang pagbanggit ng maaaring problema ng kostumer at paano mo ito maaayos. Sa dulo, magpasalamat ka at humingi ka agad ng appointment.

 

#2 Social Media

Kung may email ka man o wala ng kostumer, sunod mong ayusin ay ang Facebook Page mo o anumang account mo sa social media. Tandaan na di personal na account into kundi isang Business Account. Dahil na din mas maraming features kang magagamit kung pang negosyo ang gagamitin mong account.

Ang maaaring dahilan sa pagbuo ng social media account ay ang posibildad na may mas ma-target kang wala naman talaga sa listahan mo ngunit kapaerah ng mga iba mo ng kostumer. Kaya kasing ma-target ito sa pamamagitan ng tinatawag na “preferences” na ayon sa datos ng social media gaya ng Facebook.

Ang unang paggamit ng social media ay tinatawag na Customer Service – o serbisyo para sa kostumer. Mas mabilis ang pagsagot lalu na’t sa Comments o Messenger nagpunta ang kostumer.

Kung sa sales (o pagbenta) mo naman gagamitin ang social media, di madali itong gawin. Ang madalas kong ginagawa ay ang pag-boost ng mga post. Subukan mo to. Halagang 40 pesos lang naman kada boost ng post.

 

#3 Networking

Ang networking o ang pagkikita-kita ng mga taong maaaring may pangangailangan sa isa’t isa ay nangyayari pa rin ngayon kahit maraming nasa social media? Bakit? Kasi mas mabilis mong ma-close ang isang negosyo kung kaharap nyo ang isa’t isa. Mas mabilis kasing nabubuo ang tiwala sa isa’t isa.

 

Paano ba sinisimulang ang networking? Madali lang ito. Kung may mga organisasyon ang ginagalawan mong negosyo, ang pagsapi man at ang pakikisalamuha sa mga ka-industriya mo ay simula na ng networking.

Sa mga pagtitipon, siguraduhing may dala kang Business Cards (tarheta). Ito kasi ang madalas na nagpapalitan sa isang Networking Event. Hanapin ang mga skeydul sa ibang ibang anunsyo gaya ng Facebook o Instagram o Twitter. Sa Internet, mas malawak mo itong masasaliksik.

Tandaan na di naman mahirap magsimula sa marketing bilang isang SME. Kailangan lang na lagi kang nag-aaral. Samahan mo ng dasal at umpisa na an patungo sa tagumpay.

 

Si Homer Nievera ay isang technopreneur. Maaari siyang makontak sa email niya na chief@negosentro.com

branding sa negosyo

Bakit Mahalaga ang Branding sa Negosyo?

ni Homer Nievera, CDE, CVM | Ano sa palagay mo ang pinaka-popular na toothpaste? Kung Colgate ang sagot mo, tama ka! Kung tatanungin ko naman kung ano ang pinaka-popular na search engine, malamang ang sagot mo naman ay Google. Tama na naman yun!

Malaking halaga ang naibabahagi ng isang brand sa pagpapa-unlad ng isang negosyo. Di dapat ibinabale-wala ang branding. Ano nga ba ito?

Ang branding ay ang pag-posisyon sa iyong produkto o serbisyo sa pamamagitan ng kakaibang pangalan o pagpapaalala sa iyong merkado kung sino ka at ano ang katauhan mo. Yan ang pagkilala ng mga kostumer mo sa yo. Kaya naman kung popular ang brand mo, binibili ka higit sa iba.

#1 Posisyon sa isipan

Alam mo ba na ang pinaka-mahalaga sa branding sa negosyo ay ang kakaibang pagposisyon sa isipan ng mamimili kung sino ka bilang produkto o serbisyo? Isa itong simbolo na kumakatawan sa iyong produkto o serbisyo.

Isang halimbawa ay ang gasolinang Caltex. Alam niyo ba na tuwing nagpapakarga ako ng Caltex (gasolina man o diesel) sa aming mga sasakyan, sumasagi sa isip ko ang komersyal sa TV kung saan tila nililinis ng mga tao ang aking makina? Yan mismo ang nagagawa ng branding. At ayun na nga – Caltex lamang ang ikinakarga ko sa aking mga sasakyan. Bukod pa ditto, pati langis sa kotse, Caltex na din ang gamit ko. Kahit pa sa anong talyer o gasolinahan ako magpapa-change oil, may dala akong Caltex na langis.

#2 Posisyon sa merkado

Kung nais mong lumamang man o makaaakit ng ibang kostumer patungo sa iyong produkto o serbisyo, branding ang kailangan.

Noong ako’y nagtatrabaho pa sa “ahensiya” o advertising agency, nahawakan ko ang brand na San Miguel Beer, partikular ang Pale Pilsen. Dito ako unang nahasa sa mga istratehiya sa branding. Natutunan ko na mahalagang ma-protektahan ang posisyon mo sa merkado lalu pa’t nangunguna ka. Kaya naman noong naglabas ang San Miguel ng iba’t ibang sukat ng Pale Pilsen gaya ng Miguelito at Grande, Nakita ko agad ang mga istratehiyang ilaban ang dalawang laki ng Pale Pilsen na ito sa mga bagong salta na mga brand ng beer noon gaya ng Beer Hausen (ng Asia Brewery) at pati na rin ang mga inuming alak sa probinsiya. Bukod sa lasa, yung matitipid mo sa malaki man o maliit na Pale Pilsen ay sapat na iposisyon nang maayos ang brand ng beer na San Miguel para ma-protektahan mula sa mga kalaban.

Isa pang halimbawa ay ang mga produktong Organic at Herbal gaya ng Daila Herbal. Kung di niyo pa naririnig o nakikilala ang brand ng Daila ay dahil na din na di kayo ang merkado nito. Ngunit dahil namamayagpag ang brand na ito, alamin natin kung bakit at paano. Simple lang. Dahil na din ang Daila Herbal at Organic na mga produkto ay totoo sa kanilang brand — herbal at organic.

#3 Posisyon sa Bulsa

Sa dulo, ang benta ng isang produkto ang iyong nasa isipan kung gagawa at gagamit ka ng mga istratehiya sa branding. Paano bai to ginagawa?

Sa una, kailangan mo ng pagsasaliksik upang makita mo ang mga ginagawa (o di ginagawa) ng iyong mga kalaban na produkto o serbisyo. Isulat ang lahat ng ito at i-organisa. Kapag naayos mon a ang mga datos, makikita mo na kung ano’ng mga puede mong gawin para maiba ang iyong brand sa kalaban.

Tingnan nyo ang mga motel. Tiyak namang kalaban nila ang mga mas malalaki at magagarang hotel, di ba? Kaya naman para lumaban sa malalaki, naisip nilang ibahin ang target na “bulsa” na sa simula ay ang masa. Inayos nila ang ang presyo na naaayon sa ilang oras (walong oras, halimbawa). Mas mura nga naman lalabas kung tattlo hanggang walong oras lamang ang babayran ng kostumer kaysa buong araw (24 oras?). Inayos din ng mga motel ang disenyo ng mga kuwarto na naaayon sa panlasa ng bawat kostumer.

Ngayon, naiposisyon na ng mga motel sa pagsasakutaparan ng mga bridal shower, stag party, at iba’t ibang mga kasayahan na mas mura sa mga hotel. Naisakatuparan nila ang tamang branding sa buong industriya ng mga hotel.

Sa ngayon, ano’ng posisyon ng iyong brand laban sa mga kalaban? Pag-isipang mabuti at simulan na ang masusing pag-aaral.

Si Homer Nievera ay isang serial technopreneur at makokontak sa chief@negosentro.com

david almirol multisys

4 na Bagay na Natutunan Ko sa Isang Dating OFW na Bilyonaryo na Ngayon

ni Homer Nievera, CDE, CVM | Marahil marami sa inyong sumusubaybay sa pitak ko na OFW, dating OFW o kapamilya ng isang OFW. Pangarap natin ang makaraos at yumaman. Si David Almirol ay isang dating OFW. Probinsiyanong maituturing na tubong Isabela.

Nadestino siya sa isang malayong bansa sa Middle East at nagtrabaho sa kampo ng mga Amerikano bilang IT support. Ang mga naging boss nyang Amerikano ay nagturo sa kanya ng mga iba-ibang klase ng patungkol sa IT at ditto niya nasimulan ang mangarap na magkaroon ng sariling negosyo.

Nang makauwi na si David sa Pilipinas, di niya nakalimutan ang mga naituro sa kanya at nagsimulang unti-unting buuin ang kanyang pangarap.

Kamakailan, binili ng PLDT Group ni Manny V. Pangilinan (kilala sa MVP) ang parte ng kanyang negosyo na Multisys sa halagang 2.15 Bilyong Piso. Bilyonaryo na si David.

Paano niya ito nakamit at patuloy na nakakamit? Ito ang natutunan ko sa kanya sa pakikipag-usap at interaksyon sa kanya:

#1 Maging bukas sa kaalaman

Nang mapunta sa ibang bansa si David, di naman siya ganun kabihasa sa IT. Marunong siya, oo. Pero paano ito negosyohin, di pa niya ito kabisado. Kaya naman nang tinuturuan na siya ng mga naging boss nyang Amerikano, pilit niyang pinag-aralan ang lahat ng itinuro sa kanya. Di lamang basta kaalamang IT ang kanyang pinag-aralan kundi pati na rin ang pakikipagsalamuha sa iba’t ibang mga tao. Ang pagiging bukas ni David sa kaalaman ang naging susi para lalo siyang matuto pa.

#2 Alamin ang pangangailangan ng iba

Lahat naman ng mga tao, lalo na ang mga negosyante, ay may kanya-kanyang pangangailangan. Para sa kanila, problema ang mga ito. Ang abilidad upang malaman ang soluyon sa mga ito at maisakatuparan para sa mga nangangailangan nito ay susi sa tagumpay sa negosyo. Nalaman ko kay David na sa kanyang pagnenegosyo, madalas nyang binabasa ang balita ukol sa pangangailangan ng mga kumpanya sa larangan ng IT systems. Dahil magagaling ang mga tauhan niya, gagawin na ni David ang mga IT systems na ito habang nag-bi-bidding pa lang ang mga nais makakuha ng proyekto. Kaya naman kung sino man ang manalo sa bidding, lalapitan na ni David ito at i-offer ang nagawa na nila sa murang halaga. Siyempre, wala nang hirap ang nanalo at may negosyo na agad si David. Winner di ba?

#3 Lahat kaibigan

Si David ay pala-kaibigan sa buhay at negosyo. Di siya gumagawa ng kaaway kundi kaibigan. Ang prinsipyong ito ay makikita sa mahigit 47,000+ na payment partners ng kanyang kumpanya. Halos lahat ng kilalang kumpanya na may kinalaman sa online payments ay tinaguriang partners ni David. Mas mahalaga sa kanya na buksan ang linya ng pagsasama-sama kesa gumawa ng mga kalaban. Para kay David, lahat dapat panalo.

#4 Di Paglimot sa pinagmulan

Sa isang pagtitipong naimbitahan si David ng isang mataas na opisyal ng pamahalaan, ipinakilala sia ng opisyal kay Manny V. Pangilinan na pinuno ng PLDT Group. Sa kuwento mismo daw ni MVP, nagulat at natuwa siya sa buhay OFW ni David at kung paano niya naitayo at napalaki ang Multisys. Nung mga panahong iyon, di kilala ang kumpanya ngunit Malaki at malawak na pala ang sakop ng negosyo nito. Mula sa unang pagkikita nila, nabuo ang pagpasok ng PLDT Group sa Multisys at nangyari na ang bilyon-bilyong transaksyon dito.

Sa buhay nating mga Pilipino, marami mang dagok ang dumating, ay nakakatayo pa rin tayo. Wag natin isantabi ang mga karanasang ito dahil ang mga ito ang susi at gagabay para tayo magtagumpay bilang negosyante. Magsimula sa maliit. Lakihan ang pangarap. Manalig sa Diyos.

Si Homer Nievera ay isang serial technopreneur at makokontak sa chief@negosentro.com

Pinoy Entrepreneur

Isang Araw sa Buhay ng Isang Pinoy Entrepreneur

ni Homer Nievera, CDE, CVM | Noong Biyernes ng hapon, nagkita kami ng isang batang entrepreneur na aking mine-mentor. Napansin ko na magkasunod na araw ko na itong ginagawa sa loob ng isang linggo. Sabi nga ni Jack Ma, ang bilyonaryong founder ng Alibaba, pagdating mo daw ng singkwenta anyos, legasiya na daw ang iyong gagawin sa pamamagitan ng pagtututro o pag-mentor sa kabataan.

Kaya naman naisip kong ibahagi sa mga sumusubaybay ng aking pitak ang pagsilip sa isang araw sa buhay ko bilang Pinoy entrepreneur. Narito ang aking salaysay.

Saan Ako Nagsimula

Nagsimula ako sa pagnenegosyo noong elementarya pa lang ako sa Don Bosco Makati. Nagbebenta ako ng Chocnut sa mga kaklase at nagpaparenta ako noon ng komiks (Marvel, DC etc.). Ginagawa ko ito tuwing hapon kung saan maraming tumatambay na estudyanteng nag-aantay ng sundo.

Noong high school, nagsimula akong magbenta ng mga magazine subscriptions at pagdating nang kolehiyo, nag-prodyus ako ng mga concert.

Nagtrabaho din ako sa mga kumpanya gaya ng mga ad agency at malalaking multinational hanggang sa mapadpad akong uli sa media kung saan mas nagustuhan ko hanggang sa dumating ang Internet. Nagtrabaho ako sa global team ng Friendster at Multiply na naging simula ko sa pagnenegosyo online. Nagtayo ako ng negosyo sa Amerika hanggang sa maibenta ko ito at umuwi sa Pinas upang makatulong sa mga startups.

At heto ako ngayon, nag-publish ng 20+ na blogs na binabasa sa buong mundo. Nakabase sa abroad ang aking mga blogs at dahil sa Internet, puwede akong magtrabaho kahit saan.

“Almusal Namin ni God”

Nagsisimula ang aking araw sa tinatawag kong “Breakfast with God.” Ganun nga talaga ang ibig sabihin nun. Nagtitimpla ako ng kape at kasama ang isang maliit na pakete ng biskwit ay nagdarasal sa harap ng aming altar. Sa iba, maaaring meditasyon ang tawag nila ngunit sa ganang akin, sinisimulan ko ang araw ko sa pagdarasal.

Ganito ang una kong gawain sa unang yugto ng aking araw. Inilalatag ko sa Diyos ang lahat ng aking gagawin sa buong araw at humihingi ng basbas at direksyon.

“Projects List”

Matapos ang aking simpleng almusal, sumasalang na ako sa computer ko, habang katabi ang cellphone. Una kong sinisilip ang listahan ng mga proyekto kong tumatakbo at tinitingnan kung may miting ako sa araw na yun.

Iniisa-sa ko ang mga proyekto at tinitingnan ang mga dapat matapos sa araw na yun.

Koordinasyon

Matapos kong mai-plano ang araw ko sa pagtingin sa mga nakasalang na proyekto at pag-alam sa mga priyoridad, agad akong nag-coordinate sa mga taong kinauukulan sa mga proyekto.

Dito gumagana ang lahat ng gamit kong teknolohiya sa pag-coordinate mula sa Viber, Facebook Messenger, WhatsApp, Zoom, Skype at Email. Lahat yan ay nagagamit ko depende sa mga kausap ko.

Ang mga tao ko ay naka Viber at Messenger panigurado habang naka-abang sa kanilang mga email. Sa mga kausap ko abroad, WhatsApp, Zoom at Skype and madalas na gamit namin bukod sa Email.

Buong araw nangyayari ang koordinasyon ko.

Kapag naman ako nasa miting, patuloy ang gulong ng koordinasyon dahil palaging may nakakopyang Project Manager sa mga proyekto para masagot agad ang kaya naman nilang sagutin. Makakaantay naman ang ibang gawaing pang akin lamang.

Pagtatapos

Di tiyak ang oras ng pagtatapos ko sa trabaho sa isang araw. Ngunit kapag patapos na ako, inililista ko sa isang notebook ang mga nangyaring kailangang ausin pa kinabukasan at sa susunod pang mga araw.

Sa totoo lang, di naman talaga natatapos nang tuluyan ang mga gawain sa isang araw lamang. Ngunit kailangan mo din magpahinga at magkaroon ng oras sa pamilya.

Dahil kami na lang ng asawa ko ang ang madalas na magkasama sa bahay, Netflix ang aming libangang magkasama. Siyempre, may panahon din akong magluto na siya kong gawaing panghimagas sa trabaho.

Bago matulog, balik ako sa pagdarasal. Dito naman, pasasalamat sa Diyos ang aking dasal.

Ikaw, paano ang isang araw mo bilang entrepinoy?

Si Homer Nievera ay isang technopreneur. Maaari siyang makontak sa email niya na chief@negosentro.com

Pagkakitaan ang Blog

4 na Paraan para Pagkakitaan ang Blog (o Social Media)

ni Homer Nievera, CDE, CVM | Marahil marami ka ng pagkakataong nakakaalam ng mga taong kumikita sa kanilang pag-blog, mula sa pagsusulat, pag post sa social media, hanggang sa pag video. Nag-iisp ka na din sigurong gumawa ng sarili mong blog o vlog pero di mo alam paano ba magsimula. Tara, kuwentihan kita.

#1 Alamin kung saan ka mas magaling

Iba-iba kasi ang paraan ng pag-blog gaya ng nasabi ko sa una. Kung mahabaang pagsusulat ang kaya mo — tagalog man o ingles — magbukas ka muna ng blog sa Blogger o sa WordPress. Ang paggamit ng isa sa mga ito ang panimula sa paglalagak ng iyong mga kaalaman, kuwento o repleksyon. Kung maiigsi lang ang nais mong ilathala, sa Facebook o Twitter o Instagram ka magsimula. Mas mainam kung may kasama g larawan ang mga post mo dito. At kunv mas ok sa yo ang video, sa Youtube ka magsimula.

#2 Alamin ang panggagalingan ng kita

Di pare-pareho ang kitaan sa mga platapormang nabanggit ko sa #1. Depende din ito sa panggagalingan ng kita. Sa Youtube, sa mga ads mula sa Google at Youtbe nanggagaling ang kita. Naghahatian lang kayo sa kita (20% ang sa yo). Kapag marami ka ng subscribers sa channel mo, lumalapit na ang mga corporate sponsors. Sa Facebook at Instagram, mas umaasa sa sponsors ang kitaan dito. Sa Facebook videos, meron ding kitaan mula sa revenue-sharing, pero mas ok pa din sa YouTube. Sa blogging naman sa Blogger or Blogspot, sa Google Adsense kumikita. Sa WordPress naman, puwedeng kumita sa Google Adsense at sa mga tinatawag na advertising networks.

#3 Palaguin ang followers o subscribers

Sa kahit na ano’ng klase ng blog (o social media),  ang traffic o dami ng mga followers o subscribers ang pinagmumulan ng advertisers o sponsors. Kaya naman ang dapat mong gawin ay ang iba’t ibang paraan ng marketing. Di ko man mailalahad ang lahat ng paraan dito sa pitak na ito, simulan mo sa paggamit ng Facebook sa promotion. Bakit? Kasi ang Facebook ang may pinaka saktong pamamaraan sa paglagay teksto, larawan, video, at links. Mas mainam ding mag boost ng post sa halagang 40 pesos para mas mabilis ang mag angat ng followers.

#4 Pagkuha ng partners

Sa ngayon, ang Negosentro.com na blog ko ang pinakamatagumpay sa.mga 30+ blogs ko. Lumago ito mula 8 taon na ang nakakaraan dahil sa pagkuha ko ng mga partners mula sa mga nagsusulat (contributors) hanggang sa advertisers. Ang Facebook Page naming mag asawa na He Said she Said Philippines na may mahigit 400,000 followers ay nagtagumpay din dahil sa parehong paraan. Buksan mo ang pinto sa mga partners na silang tutulong sa yong palaguin ang followers at advertisers mo.

Ang mahalaga sa lahat ng ito ay magsimula ka sa  pagtuklas kung ano ang kaya mong ibahagi sa mundo sa pamamagitan ng blog at social media. Gawin mo tong passion mo. Kasunod na ang kumita para dito.

Si Homer Nievera ay isang serial technopreneur at makokontak sa chief@negosentro.com

Maayos na Komunikasyon sa Opisina

4 na Tips Para Panatilihin ang Maayos na Komunikasyon sa Opisina

ni Homer Nievera, CDE, CVM | Ang isang malaks na negosyo ay nakatayo sa maayos na komunikasyon sa loob mismo ng opisina. Kung mahina ang komunikasyon, watak-watak ang organisasyon, bagsak ang negosyo. Kaya kung nasa tama ang pagsasaayos ng komunikasyon ng mga tauhan at boss, siguradong mabilis ang pag-angat ng negosyo mo. Narito ang ilang tips:

#1 Ayusin ang mga panuntunan sa pagiging bukas sa komunikasyon

Kung di mo mapanatiling bukas ang linya ng komunikasyon dahil na din sa mga maling panuntunan sa opisina at negosyo mo, sa una pa lang, di na magiging maayos ang nais mong ipatupad. Ang kasabihang “bukas ang aking pintuan” na madalas wika ng mga boss, ay di na masyadong ipinatutupad. Kaya kung ang pakiramdam ng mga empleyado ay di na sila pakikinggan sa unang pagkakataon pa lang, di na sila tuluyang magsasalita. Kung anuman ang mga ideya na sana ay kanilang maimumungkahi, di na ito masasabi pa. Sayang naman.

Ang pagkakaroon din “reward system” sa mga idea na iminumungkahi ay maari mo ding ipatupad. Madalas, ginagawa ito ng mga malalaking kumpanya. Bakit di mo kaya subukan naman sa negosyo mo?

#2 Madalas na miting

Kahit gaano ka-busy ang mga tao, ang pagkakaroon ng madalas na miting ay importante. Ang simpleng isang beses kada lingo na miting ay malaki ang naidudulot sa organisasyon.

Sa katunyan, nangyari na ito sa akin nang iniwan ko sa isang head ko ang pakikipag-miting sa mga tao. Di na niya pala nai-miting ang sales team kaya ayun, isang buwan pa lang, bumaba na agad ang benta.

Tandaan na ang madalas nap ag-miting ay pagkakataon ding maibaba o maiakyat ang anumang mga mungkahi ng mga tao.

#3 Gumamit ng teknolihiya sa pag-miting

Alam ko namang mahirap ngayon makakuha ng 100 porsyento ng dadalo sa mga miting sa maraming dahilan. Ngunit may mga apps na ngayon na nagagamit namin lalu pa’t may organisasyon akong lahat ay “work-from-home” na.

Ang paggamit naming ng Zoom, Skype, WhatsUp, Viber at Messenger ay malaking bagay sa aming komunikasyon at sa larangan ng pagmimiting.

Wala nang dahilan na di makipag-miting, saan ka man naroroon.

#4 Bonding time

Ang pagkakaroon ng mga Team Building, Retreat, Outing, at iba pa ay di lamang pagkakaroon ng pahinga kundi ang pagkakaroon ng pagkakataong magsama-sama at mag-usap-usap sa mas maluwag na pamamaraan. Di naman kailangang magingmamahalin ang lugar. Ang mahalaga ay sa labas ito ng regular na opisina.

Sa pamamagitan nito, nagkakaroon ng pagkakataong makilala ang isa’t isa sa labas ng opisina at magkaroon ng pag-uusap sa interes ng iba maliban sa negosyong ginagalawan.

Ang sandigan ng isang matatag na negosyo ay komunikasyon sa loob at labas ng organisasyon. Bilang boss o manager, dapat isaisip ang halaga ng komunikasyon habang maaga pa.

Si Homer Nievera ay isang technopreneur. Maaari siyang makontak sa email niya na chief@negosentro.com

5 Aral sa Pagtatayo ng Negosyo Mula sa Kitchen Hub

ni Homer Nievera, CDE, CVM | Noong Biyernes, habang nagbabalak na sanang umuwi mula sa SM City Sucat, napadaan kami ng anak ko sa gitna ng mall kung saan may mga kiosk ng iba’t-ibang uri ng pagkaing gawa ng malikhaing mga Pinoy. Nakita ko ang Kitchen Hub, na tindahan ng mga nakaboteng Gourmet Tuyo na paborito naming mag-asawa. Nagbabakasakali akong meron silang Gourmet Daing na nasa bote at ang tumambad sa akin ay ang iba’t-ibang klase ng Gourmet Tuyo, Daing at iba pa na iba’t-ibang mantika ang ginamit.

Habang bumibili ako, tinanong ko na din ang mga binatang nagtitinda na sila pala’y mga anak ng may-ari na si Joy Dabu. Iniwan ko ang tarheta ko dahil naisip ko silang maisulat sa isa kong online publication.

Nang kami ay magkausap noong Sabado nang gabi, marami akong natutunan kay Gng. Dabu, na isang dating empleyado at napunta sa pagnenegosyo nang di daw sinasadya. Eto ang kuwento niya na nakalubid sa mga aral na kanyang ibinahagi:

gourmet tuyo kitchen hub

Pinaka-paborito ko ang Gourmet Tinapa at Gourmet tuyo

#1 Walang aksidente sa pagpasok sa negosyo

Si Gng. Dabu ay may anak na nagkasakit, at eto ang dahilan kung bakit tumigil siya sa pagtrabaho upang matutukan ang pag-aalaga dito. Ang asawa niya ay OFW noong mga panahong iyon. Naikuwento ni Gng. Dabu na sa paghahangad na kumita upang matustusan ang kanilang pangangailangan sa araw-araw, kung anu-anong negosyo ang kanyang naisip. Dahil matagal siyang empleyado at walang ibang alam kundi ito, di na muna siya nagpumilit makipagsapalaran. Ngunit nagsimula siyang magkaroon ng inspirasyon sa pamamagitan ng kanyang mga panaginip tungkol sa negosyong Gourmet Tuyo. Di lang isang beses ito raw nangyari. Kaya naman naisipan niyang magsaliksik ukol sa ganitong produkto.

Ang aral dito ay ang di pagbale-wala sa inspirasyon. Ayon kay Gng. Dabu, nagbunga ang kanyang pagdarasal at dito niya iniugnay ang pagsimula ng Kitchen Hub.

#2 Magsaliksik nang husto

Dahil na din sa wala siyang kaalaman sa pagnenegosyo, lalu pa’t kaugnay sa papasukan niyang Gourmet Tuyo, nagsaliksik si Gng. Dabu nang husto. Mula ito sa pagluluto, pagtimpla at paggamit ng mga organic na sahog para sa panlasa at pagpapatagal sa bote, nagsaliksik siya. Pumunta pa nga si Gng. Dabu sa DOST para tulungan siya sa pormulasyon ng kanyang produkto.

Ang aral dito ay ang walang katapusang pag-aaral para sa ikaaangat ng negosyo.

#3 Sipag at Tiyaga

Ang dalawang salitang ito ang agad na naibulalas ni Gng. Dabu nang siya’y aking tanungin kung ano ang higit niyang ginawa bukod sa pagdarasal. Wala naman talagang tatalo sa sipag at tiyaga para umangat ang negosyo, di ba? Naikuwento kasi ni Gng. Dabu na nagsimula siya sa paglalako sa mga kaibigan at kapitbahay. Ang patuloy na paghahanap ng tamang sahog, bote, packaging at labels ang kanyang naging higit na puhunan sa negosyo. Nagbunga naman ito, at dahil sa aral na – sipag at tiyaga – di ba?

#4 Mahalaga ang papel ng kapamilya

Noong nagsisimula pa lang si Gng. Dabu sa Kitchen Hub, ang kanyang pamilya ang naging haligi, sandigan at katulong sa pagbuo ng konsepto ng produkto. Mula sa pagtikim at pagbenta, hanggang sa pagdamay sa kanilang mga pinagdadaanan ang mga mahahalagang bagay kung bakit nagtagumpay sila sa kanilang negosyo.

Ang mahalagang aral dito ay ang di pagbale-wala sa halaga ng pamilya sa iyong pagnenegosyo. Para sa kanila rin yan, di ba?

#5 Tuloy-tuloy lang para sa mas malaki pang tagumpay

Sa aking panayam kay Gng. Dabu, nabanggit niya na nais niyang makarating sa iba’t-ibang bansa ang Kitchen Hub na Gourmet Tuyo at iba pang produkto. Di kasi siya tumigil sa paglalako at ngayon naman ay ang pagbukas ng kiosk sa SM City Sucat. Nang matanong ko siya kung meron na siyang online delivery, di naman niya naikaila na di daw siya techy. Kaya naman sinabi ko sa kanya na tutulungan ko siya sa aspetong yun. Ganyan kasi dapat ang negosyante, na patuloy ang paglawak at paglaki ng kanyang nasasaisip na tagumpay.

Wag kang titigil, ka-negosyo. Anuman ang tagumpay (o dagok) na iyong pinagdadaanan at kinakaharap, tuloy lang sa pag-angat at pagbangon. Para kay Gng. Joy Dabu at sa kanyang Kitchen Hub, gogogo lang po! Sumainyo ang Diyos!

Si Homer Nievera ay isang technopreneur. Maaari siyang makontak sa email niya na chief@negosentro.com

Maka-target ng Tamang Kostumer

3 Paraan Para Maka-target ng Tamang Kostumer

ni Homer Nievera, CDE, CVM | Ano man ang iyong negosyo, tiyak na may iba’t ibang uri ng kostumer ang yong nakakasalamuha. Ngunit may ilang uri lamang ng kostumer ang nakakapagdala ng malaking benta sa negosyo mo. Itong mga klaseng kostumer na ‘to ang dapat na tutukan at pagtuunan ng pansin.

Sa tinatawag na Pareto’s Principle, sinasabi na 20% ng iyong mga kostumer ang nagdadala ng 80% ng benta mo. Maaari din sabihing ang 20% ng isang uri ng mga kostumer mo ang nag-aakyat ng 80% ng kita mo. Kung gayun, paano mo malalaman kung sino ang mga ito?

Narito ang ilang tips…

#1 Saliksikin ang datos ng mga benta at kostumer

Ang unang gawain sa masinsin na pagpili ng kostumer na tatargetin ay ang pagsaliksik ng mga datos ng mga benta mo kung saan makikita ang uri ng kostumer na bumili sa yo. Kung online ang bentahan, mas madali itong makikita.  Ngunit kung wala ka pang datos, mas maiigi na yung magsimula kang mangalap ng datos na ito mula ngayon. Kung meron kang “feedback form,”mas ok. Ang mahalaga ay makuha mo ang pangunahing datos gaya ng gender, edad, lokasyon (tahanan), at kung ano ang binili o binibili sa yo. Kapag nakuha mo na ang mga datos na ito, mas madali mong mailagay sa kanya-kanyang kategorya ang mga mamimili mo.

Mula sa mga datos na ito malalaman mo ang porsyento ng mga klase ng bumibili sa yo at kung ano ang binibili at sa gaano kalaking halaga. Ang mga datos gaya ng edad, lokasyon at iba pa ay makakatulong ng malaki upang mapagpare-pareha ang uri ng kostumer sa uri ng mga binibili ng mga ito. Ang lahat ng datos na ito ang magbibigay sa yo ng kaalaman kung paanong promo o marketing ang gagamitin para pabalik-balik sila sa negosyo mo.

#2 Imaginary na Kapihan kasama ang isang imaginary na kostumer

Ang kunwaring pakikipag-kape sa isang kostumer (na imahinasyon mo din!) ang isa sa mga epektibong pamamaraan ng pag target sa isang kostumer mo. Ang tawag ko dito ay ang “Scarcity Thinking” kung saan nais mong sumentro sa iisang kostumer lamang dahil alam mong marami pang tulad ng kostumer na ito. Sa pagtutok sa iisang kostumer na ito mo malalaman ang maraming bagay sa sa kanya mula gender, edad, lokasyon, mga hilig (hobbies), ayaw, hanggang sa mga kasalukuyang pinagdadaanan niya. Maaari mo ding gawing makatotoohanan ang pakikipag-kape sa isang tunay na kostumer na sa tingin mo ay representate ng malaking bilang pa ng mga kostumer mo. Ang paraan ng pagsasaliksik na ito ay epektibo dahil mas ramdam mo ang kanyang sitwasyon, at naiintindihan ang mga rason kung bakit siya bumibili sa yo ng ilang bagay (o serbisyo), at bakit din hindi.

#3 Gamitin ang social media gaya ng Facebook

Ang social media gaya ng Facebook Page ay may mga datos na ang tawag ay “Insights.” Bukod sa “Shop”ng FB kung saan may ilang datos na makikita sa mga kostumer, ang mga FB Ads at FB Posts mo ay may mga katapat na datos kung saan makikita ang pinahahalagahan nila para sila ay mag-like, share o comment. Lalu na kung may link (papuntang website mo) ang mga posts, mas mabilis mapag-aralan ang galaw ng mga kostumer mo at makita ang porsyento ng “conversion”o pagbili nila sa yo.

Isang halimbawa ang pagbilang ng mga nabebentahan mo na nag-pm (personal message) sa FB Messenger. Makikita mo ang “conversion rate”o porsyento ng mga bumili sa yo mula nang nag pm sila. Kunin lang ang datos nila gaya ng bagay na binili at sap ag silip sa kanilang FB ccount, malalaman mon a din ang maraming bagay ukol sa mga kostumer na ito.

Sa dulo, ang mahalagang gawin ay pag-aralang mabuti ang mga kostumer mo na masasabing may halaga sa negosyo mo. Hindi po tsamba-tsamba ang bentahan. May datos po dapat para di masayang ang pera at pagod sa marketing mo.


Si Homer Nievera ay isang technopreneur. Mag email lang sa kanya ng mga katanungan ukol sa pitak na ito sa chief@negosentro.com.

Branding sa Negosyo

4 na Rason Bakit Mahalaga ang Branding sa Negosyo

ni Homer Nievera, CDE, CVM | Madalas mong naririnig ang salitang “brand.” Madalas din napapagkamalang magkapareho ang salitang brand sa salitang “product”(o produkto).

Ang brand ng isang produkto mo ay siyang nakikilala sa merkado, maliban na lang kung ang prdukto mo ang pinaka-una sa kategorya o industriya nito. Gaya ng Colgate na naging katapat na ng salitang Toothpaste. Gayundin ang Gasul na naging katapat ng LPG. Sila kasi ang ilang lang na nauna sa ganung klase ng mga produkto noon. Kaya naman sa madaling salita, ang isang brand ang siyang  nakalagay sa label ng produkto.

Bakit nga ba mahalaga ang branding? Tara, talakayin natin.

#1 Kailangan ng mapagkikilanlan ang produkto o serbisyo mo

Higit pa sa logo mo ang branding sa negosyo mo. Ang akala kasi ng karamihang negosyante, kung may kakaiba at natatanging disenyo ang logo mo, ok ka na. Hindi po ganun iyon. Sa kabilang banda, ang “katauhan”ng iyong logo ang mas mahalaga sa mga kostumer.

Tanungin mo ang iyong sarili kung ano katauhan na pumapalibot sa brand mo. Ito kasi pagkikilanlan ng negosyo mo. Pag-isipan ang katauhan ng brand na Jollibee sa pamamagitan ng mascot at logo nito. Ano ba ang sinisimbolo ng mga ito?

#2 Simbolo ba ng tiwala ang iyong brand?

Ang mga malalaking pribado na ospital sa Pilipinas at madalas na may mga simbolo na may kasamang krus at kulay na puti. Bakit nga ba? Dahil ang mga sinisimbolo nito ay tiwala.

Mahalaga kasi sa mga kostumer ang mga brand na sumisimbolo sa kanilang pagtitiwala na maayos o magaling o mabisa ang produktong binebenta mo. Pinaghirapan kasi nila ang perang ipapambayad sa yo kaya importante ang pagkumbinse sa kanila na maayos at katiwa-tiwala ang produkto mo.

Kaya naman sa lahat ng bagay na sisimbolo sa brand mo, saliksiking mabuti kung lalabas ang pagtitiwala ng mga kostumer mo.

#3 Sino o ano ang maaalala ng mga kostumer mo?

Natanong mo na ba sarili mo kung bakit may mga kinukuhang mabibigat na endorser ang mga produkto ng mga malalaking kumpanya? Bakit ang daming ine-endorso ang mga tulad ni Sen. Manny Pacquiao?

Bukod sa tiwala na maaaring dala nila, ang kredibilidad nilang “mailako” ang kanilang mga produkto sa pamamagitan ng “brand recall.” Ang “brand recall” ay nangangahulugang naididikit nila ang brand mo sa endorser kaya mas mabilis maalala ang brand mo ng mga kostumer.

Di naman ganun kasimple lang yun ha. May kasamang pagsasaliksik din ang pagkuha ng mga endorser. Di kasi lahat ng endorser na sikat ay naaayon sa personalidad ng brand mo. Maging masinop sa bagay na ito.

#4 Motibasyon sa mga empleyado ang dala ng tamang branding

Ang maaaring dala na motibasyon sa mga empleyado mo ay isa ding rason kung bakit mahalaga ang branding. Bakit ba ang daming nais magtrabaho sa mga tulad ng San Miguel, BPI, Google at Facebook? Bukod sa maaaring magandang sweldo o benepisyo, ang “bragging rights”ay mahalaga, lalu na sa mga milenyal. Ang pagtrabaho din sa mga katulad nitong mga kumpanya ay makakatulong sa mga susunod pang trabaho nila.

Ganyan kahalaga ang branding sa motibasyon ng mga empleyado. Kung nagsisimula ka pa lang na negosyo, isama mo ang iilang empleyado mo sa pagsasalarawan ng iyong branding. Sila din kasi ang unang tuulong upang mapalaganap ito na ibebenipisyo ng buong kumpanya.

Ikaw, ano ang branding mo sa sarili mo?


Si Homer Nievera ay isang technopreneur. Mag email lang sa kanya ng mga katanungan ukol sa pitak na ito sa chief@negosentro.com.

Tama ang Pagbebenta

4 na Kaalaman Paano Simulan nang Tama ang Pagbebenta

ni Homer Nievera, CDE, CVM | Kahit na ano’ng negosyo pa ang pasukin mo kung di ka marunong magbenta, walang papasok na pera at magsasara ang negosyo mo. Kaya naman naisip ko na sa loob ng dalawang taon, di ko pa naisulat ang tungkol sa paksang ito. Kaya eto na.

#1 Kaalaman ukol sa iyong produkto o serbisyo

Di makakapagsimulang magbenta kung di mo kabisado ang produkto o serbisyo na iying ibebenta. Kaya naman sa umpisa pa lang ay dapat nakahanda na ang mga ilalahad ukol sa negosyo mo. Bukod sa mga pulyetos, dapat may website ka kung saan pupunta ang mga meron pang katanungan. Ngunit ang mahalaga any handa kang sagutin ang lahat ng patungkol sa binebenta mo. Gayundin dapat sa mga nakaharap mismo sa iyong kostumer.

#2 Depinisyon ng iyong merkado

Kung di mo kilala ang tatargetin mong kostumer o merkado, para kang hilong-talilong na paikot-ikot sa pagbebenta mo. Ibig sabihin ay mahihirapan kang makapagbenta dahil mali ang pinagbebentahan mo o di ka sigurado kung sila nga mismo ang bibili sa yo. Kaya sa umpisa ay ayusin ang depinisyon ng merkado mo para di masayang ang oras. Ilista ang mga maaaring solusyon na magagawa ng binebenta mo at i-match ang kostumer. Pag nagawa mo na ito, mas madali na ang pagbebenta.

#3 Ayusin ang script

At dahil alam mo na sino ang pagbebentahan mo, ayusin mo na ang script kung paano mo ilalatag ang offering mo. Lalu na ku g di ikaw lang ang haharap sa kostumer, mas mainam ang paggawa ng script. Isipin ang lahat ng maaaring tanungin para siguradong masasagot ang mga ito. Tandaan na maaaring di lang ikaw ang gagamit ng script kundi mga tauhan mo din kaya mainam ang magpraktis. Ayusin ang script kada may bagong kaalaman para updated ito.

#4 Gumamit ng social media at iba pang digital na uri ng oagbebenta

Kung naayos mo na ang unang tatlong inilahad ko dito sa pagbebenta, puwede mo nang subukan sa mga digital na channels gaya ng social media, email at pati sa mga mobile messeging apps. Sigurado naman may mga aayusin ka pa sa script na ginawa mo para umakma sa digital channels.

Sa lahat ng klaseng negosyo, di maiiwasan ang sales o pagbebenta. Kaya magpakabihasa ka dito kahit di ka sigurado. Ang mahalaga ay kaya mo tong gawin para kung umalis man ang mga salesman mo, kaya mong saluhin ang trabaho.

Si Homer Nievera ay isang technopreneur. Maaari siyang makontak sa email niya na chief@negosentro.com